viadi d'atun sil lag da tuma

Da fina bialaura essan nus serendi la damaun cul tren sil Pass Alpsu. Ferton ch'ina gruppa ha preferiu il trutg empau pli pacific al Lag da Tuma han entgins affons priu suttapeis la via empau pli liunga e stentusa sur il Péz Pazzola; accumpignai essan nus vegni dil tgaun Paco. Pass per pass essan nus serendi dil cuolm siadora per la finfinala saver guder la biala survesta – d'in maun la Val d'Ursera e da tschei maun la biala Val Tujetsch e pli lontan la Surselva. Arrivai sisum han ils affons giu meritau ina pausa e secapescha havein era tuts nudau nos nums el cudischet spegl um da crap. 

Per gentar essan allura serendi direcziun Lag da Tuma nua che nossas conscolaras e nos conscolars spitgavan ensemen culla scolasta Lea. Suenter che tuts han giu gudiu il paus e puspei rimnau avunda energia pil retuorn sil Pass Alpsu essan nus viandai direcziun sbuccada dil Lag da Tuma e da leu anora dil trutg giuadora viers la via da Maighels. Per turnar al Pass Alpsu havein allura puspei priu il trutg ch'enqualin enconuscheva digl avonmiezdi. Da leu anora havein puspei priu il tren per arrivar a casa. 

Nus havein astgau guder in bi viadi d'atun ed ils affons san esser loschs ch'els han murdiu sils dents e la finfinala contonschiu il Lag da Tuma – tgi directamein e tgi sur il Péz Pazzola. 

 

fotografias da Tim Loretz, Lea Berther & Sandro Tomaschett