camp a tavau – 5. di

Suenter ina jamna plein activitads sportivas, culturalas ed ina pluna experientschas ed impressiuns ha ei giu num prender cumiau da Tavau. 

Gia baul ein ils emprems stai neunavon ed han entschiet a far uorden – malgrad che beinenqualin ei buc ius baul a letg. Suenter ch'ils biars han giu dustau lur uorden e pachetau las valischas essan i a solver; sco usitau ha ei dau in buffet bein empleniu e mintgin ha saviu sesurvir tenor gust e fom. Allura ha ei giu num pachetar las caussas restontas, controllar ch'ei seigi schuber e ch'ins hagi priu sias siat caussas. Avon la "jugi" spitgava il Daniel gia cun siu bus. 

Silsuenter essan serendi el Migros per cumprar enzatgei per gentar. Cul bus essan allura serendi el bogn "Eau-là-là", nua che las scolaras ed ils scolars han fatg cuorsa silla "Black Hole" – la ruschnera che pareva dad esser empau pli spectaculara che quei ch'ella ei la finfinala, sco quei ch'enqualin ha raquintau. Auters han gudiu l'aua empauet pli caulda el bogn ordaviert e schau far massascha allas musclas. Da miezdi havein bandunau il bogn frestgs e sauns, denton era cun fom. Aschia essan sesi giu el parc speras ed havein gentau ina davosa ga communablamein. 

Il viadi a casa havein puspei fatg cul bus – tgi ha durmiu, tgi ei staus profundius el smartphone e tgi ha discurriu in cun l'auter. La finfinala ein tuts stai lèds da puspei saver turnar a casa – quei cun in sacados empleniu ed era empau staunchels. Il camp vegn denton a restar en memoria a tuts. :-)

 

fotografias da Sandro Tomaschett