camp a tavau – 2. di

Nus essan levai ca. 20 vargau las sis ed havein silsuenter dau in tec ballapei cul scolast. Allas otg ha ei dau solver. Nus havein saviu magliar ualti tut, naven da cornflakes sur caschiel tochen tier schambun.

Silsuenter essan nus sepinai per ina tura naven da Tavau encunter il Jakobshorn-Ischalp-ClavadelerAlp-Tavau. Avon che nus havein denton saviu far nossa tura havein nus aunc stuiu ir a cumprar en. Tier la tura era ina dallas vias serradas, denton gliez ei stau pér dad ir engiu in problem. Quella tura ha cuzzau ca. 4-5 uras. Entuorn las 12 havein fatg nossa pausa da miezdi cun grillada. Cura che tuts han giu il venter plein han ils biars dau il giug “Werwolf” – ed auters han fatg in pign cupid da miezdi. Ina part dils buobs dalla 6. classa ha purtau siadora ca. 10 l aua ed ina melona d’aua che nus havessen bunamein saviu emplenir il Lag Claus.

Suenter essan nus i vinavon encunter Ischalp (il liug che nies anteriur camp fuss staus). Silla ClavadelerAlp essan nus i sper la “Schaukäserei” ora ed havein viu ils pasters che eran vid clauder. Sin via engiu ein in pur cun siu tractor vegnius encunter a nus. Quei pur mirava ualti brut e cun las rodas dublas vid il tractor era el ualti lads per la via. A Clavadel havein nus survegniu schliatas novitads pertucont il bus; lez vegneva numnadamein pér en 45 min. Cura che nus essan finalmein arrivai el vitg havein nus survegniu 1h 30min temps liber. Naturalmein essan nus immediat i a far il shoppen. Sco emprem el H&M suenter egl InterDiscount e sco davos aunc el Coop per ina glace.

Nossa gruppa ei stada la suletta che ha ughegiau sut la pressiun da temps dad ir anavos ella "jugi" a sescumiar. Silsuenter essan nus aunc i el Corona Bikeshop (buca manegiau il virus). Patrice e Rita han mussau da tgei tocca ch’in velo consista e tgei ch’ins ha da mirar sche p.ex. la cadeina dat adina ora. Duront la coola presentaziun da Patrice ein certs scolars bunamein sedurmentai, cunquei ch'els eran aschi staunchels dil viadi. Suenter che nus havein retschiert ina butteglia sco schenghetg essan turnai ella "jugi" e   tschenau. Tuts ein stai cuntents culla spisa e che nus eran puspei a casa. La sera ha la gronda part mirau EM Frontscha vs. Tiaratudestga (ils biars eran per la Frontscha).

Salids dils bobs (buobs 6. classa)

 

rapport dad Andrei, Flurin, Nevio, Pedro, Raffael & Tobia

fotografias da Lea Berther & Sandro Tomaschett