engraziel & sin seveser

Preziadas scolaras, preziai scolars – preziai geniturs

Igl onn da scola 2021/22 ei vargaus – malgrad ch‘ei para sco sch‘ins havess entschiet pér da cuort. Caussas datti. ;-)

Igl ei stau in onn da scola intensiv accumpignaus da corona, decisiuns, trumpadas e muments da legria, musical, exposiziun, viadis ed aunc bia auter. Adina havein nus fatg nies meglier pusseivel ed essan uss arrivai pass per pass alla fin da nossa via communabla.

Il punct culminont da quest onn da scola ei en mes egls segiramein il musical. Bugen fetschel aunc inaga a vus tuts in cumpliment per vossa grondiusa prestaziun. Ei fa mintgaga plascher d‘astgar prender encunter lauds per vus – seigies pia loschs da quei che vus haveis contonschiu! :-)

Era jeu sun loschs da vus – ed oravontut engrazieivels dad haver astgau accumpignar vus duront in ni schizun dus onns da scola. Malgrad che nossas vias sespartan cul di dad oz mirel jeu anavos sin ina massa bunas experientschas, bials e leghers muments – e quels vegnan a restar a mi e speronza era a vus en buna memoria. Per mei persunalmein havessel buca saviu giavischar ina megliera finiziun che quella alla Scola Sedrun – engraziel fetg persuenter!

Cun quella caschun engraziel era a vus geniturs per la buna collaboraziun ed il sustegn duront ils davos onns da scola; jeu hai schazegiau la collaboraziun cun vus. 

Per vies futur giavischel jeu da cor mo il meglier, seigi quei en connex culla scola, mo era ella veta privata. Gudi uss denton sco emprem la stad e seruassei per che vus seigies frestgs pil proxim capetel.

Cars salids e sin seveser :-)

cordial beinvegni

Cordial beinvegni sin "inagain.ch" – la pagina d'internet cun purschidas d'emprender, tutorials ed informaziuns per la 5. e 6. classa. 

La rubrica "instrucziun" porscha informaziuns davart l'organisaziun dall'instrucziun ed ils principis da tala; la rubrica "emprender" cuntegn strategias e cussegls d'emprender. Sut "gallaria" anfleis vus plinavon impressiuns da projects da scola dils davos onns. 

Giudem sesanflan ils apps d'emprender. Il pli seniester sil "falien" anfleis vus ils uraris, las planisaziuns dalla jamna ed ils cudischets d'emprender "lungatg" e "matematica".